8 விஷயம்
ஒரு நாள் ஷெய்கு ஷகீக் பல்கீ ரஹ்மத்துல்லாஹி அலைஹி அவர்கள் தன்னுடைய சீடர் ஹாதிம் ரஹ்மத்துல்லாஹி அலைஹி அவர்கள் இடத்தில் நீங்கள் எவ்வளவு நாட்களாக என்னிடத்தில் தங்கி இருக்கிறீர்கள் எனக்கேட்டார்கள்
32 ஆண்டுகளாக தங்களுடன் இருக்கிறேன் என்று ஹாதம் ரஹ்மத்துல்லாஹி அலைஹி அவர்கள் கூறினார்.
இவ்வளவுநீண்ட காலத்திலே என்னிடமிருந்து நீங்கள் என்ன கற்றுக் கொண்டீர்கள் என்று ஷேக் அவர்கள் கேட்டார்கள்.
எட்டு விஷயங்கள் மட்டுமே நான் கற்றுக் கொண்டேன் என்று ஹாதிம் ரஹ்மத்துல்லாஹி அலைஹி அவர்கள் சொன்னார்கள்.
இன்னாலில்லாஹி வ இன்னா இலைஹி ராஜிஊன் இத்தனை நீண்ட காலம் என்னிடம் தங்கி எட்டு விஷயத்தைத்தான் கற்றுக் கொண்டீர்களா என்னுடைய காலம் வீணாகிவிட்டதே என்று வருத்தப்பட்டார்கள்.
கண்ணியமிக்க ஷேக் அவர்களே இதை விட கூடுதலாக கற்றுக் கொள்ள முடியவில்லை அதே நேரத்தில் பொய்யையும் என்னால் சொல்ல முடியாது என்றார் ஹாத்தம் ரஹ்மத்துல்லாஹி அலைஹி
நல்லது அந்த எட்டு விஷயம் என்னவென்று கூறுங்கள் என்றார்கள் ஷெய்கு அவர்கள்
நான் மக்களை பார்க்கிறேன் அவர்கள் கப்ருக்கு செல்கின்ற வரை அவர்களுக்கு பிரியமானது அவர்களுடன் இருக்கிறது.
எப்போது மனிதன் கபுருக்கு சென்று விடுவானோ தன்னுடைய பிரியமான பொருளை விட்டு விட்டு செல்ல வேண்டிய நிலை ஏற்படுகிறது.
எனவே எனக்கு பிரியமான பொருளாக நல்ல அமல்களை ஆக்கிக் கொண்டேன்
ஏனென்றால் நான் கபுருக்கு சென்றாலும் எனக்கு பிரியமான நல்ல அமல் என்னுடன் இருக்கும் என்பதற்காக. இது முதல் விஷயம்.
மக்களைப் பார்த்தேன் யாரிடமாவது விலை உயர்ந்த பொருள் இருந்தால் அதை ரொம்பவும் பாதுகாப்பாக வைத்திருக்கிறார்கள்
பின்பு அல்லாஹ் குர்ஆனில் கூறியிருக்கும் இந்த ஆயத்து என்னுடைய ஞாபகத்திற்கு வந்தது
உங்களிடத்தில் இருக்கின்ற ஒன்று அது செலவாகிவிடும் எது அல்லாஹ்விடம் இருக்கிறதோ அது நிரந்தரமாக இருக்கும் என்ற வசனம் கண்ணில்பட்டது. (அல்குர்ஆன் அத்தியாயம் நஹ்ல் ஆயத் 96)
எனவே என்னுடைய கையில் எந்த பொருள் எல்லாம் விலை உயர்ந்ததாக இருக்குமோ மதிப்பு மிக்கதாக இருக்குமோ நான் அல்லாஹ்விடத்தில் அதை திருப்பி அவனிடத்தில் பாதுகாப்பாக இருக்கட்டும் என்று தான தர்மங்கள் செய்து விடுகிறேன் அது வீணாகாமல் இருப்பதற்காக. இது இரண்டாவது விஷயம்.
யார் தமது இறைவனுடைய சன்னிதானத்தில் நிற்பதை பற்றி அஞ்சி மனோ இச்சையை விட்டும் தன்னை விளக்கிக் கொண்டாரோ சொர்க்கமே அவரது தங்குமிடம். (அல்குர்ஆன் அத்தியாயம் : 79 வசனம் : 40, 41)
என்ற வசனத்தை படித்தவுடன் என்னுடைய மனோ இச்சைக்கு கடிவாளம் இட்டு விட்டேன் மனோ இச்சைகளை பின் தொடர்வதில் இருந்து என்னை பாதுகாத்துக் கொண்டேன் என்னுடைய மனம் அல்லாஹ்வுக்கு கீழ் பணிவதிலே உறுதி ஆக்கிக் கொண்டேன். இது மூன்றாவது விஷயம்.
மக்கள் ஒவ்வொருவரும் உலகிலே பொருளாதாரம் குடும்ப பாரம்பரியம் பட்டம் பதவிகளை பெற்றுக் கொள்வதற்கு முயற்சி செய்கிறார்கள்
இவற்றையெல்லாம் கூர்ந்து கவனிக்கும் போது ஒரு கட்டத்தில் ஒன்றுமே இல்லாததாக ஆகிவிடுகிறது
நான் இந்நேரத்தில் அல்லாஹ்வுடைய இந்த வசனத்தை கவனத்தில் எடுத்துக் கொண்டேன்
உண்மையில் அல்லாஹ் இடத்தில் உங்களில் மிக சங்கையானவர்கள் மதிப்பு மிக்கவர்கள் உங்களில் யார் ரொம்பவும் பேணுதல் மிக்கவர்களாக இருக்கின்றார்களோ தக்குவா உடையவர்களாக இருக்கின்றார்களோ அவர்கள்தான்.( அல்குர்ஆன் அத்தியாயம் : 49. வசனம் : 13)
என்ற வசனம் என்னுடைய கண்ணில் பட்ட போது நான் தக்வாவை தேர்ந்தெடுத்துக் கொண்டேன் அல்லாஹ் இடத்தில் கண்ணியத்தை பெறுவதற்காக. இது நான்காவது விஷயம்.
மக்கள் தங்களுக்கு மத்தியில் ஒருவரை ஒருவர் தவறான கண்ணோட்டத்தில் பார்ப்பதை கண்டேன் ஒருவர் மற்றவரின் மீது பொறாமை பட்டுக் கொண்டிருக்கின்றனர் இந்நிலையில் குர்ஆனுடைய ஆயத் என்னுடைய கண்ணில் பட்டது
உங்களது இறைவனின் அருட்கொடைகளை அவர்கள் தான் பங்கீடுகிறார்களா ?
இவ்வுலக வாழ்க்கையில் அவர்களின் வாழ்க்கை வசதிகளை நாமே பங்கிடுகிறோம். (அல்குர்ஆன்வசனம் : 32 அத்தியாயம் : 43)
எனவே நான் மக்களிடம் உள்ள பொருள் பட்டம் பதவிகள் மீது பொறாமை படுவதை விட்டுவிட்டு மக்களில் இருந்து ஒதுங்கி பொருளாதார பங்கீடு அல்லாஹ்வுடைய கையில் மட்டுமே இருக்கிறது என்பதை புரிந்து அல்லாஹ் நாடியவர்களுக்கு நாடியதை கொடுத்திருக்கிறான் என்பதை பொருந்திக் கொண்டு
மக்கள் மீது பொறாமை கொள்வதை விட்டும் நீங்கி கொண்டேன். இது ஐந்தாவது விஷயம்.
மக்கள் தங்களுக்கு மத்தியில் சண்டையிட்டுக் கொள்வது அடித்துக் கொள்வது திட்டிக் கொள்வது ரத்தத்தை ஓட்டுவதை பார்த்தேன் இந்நிலையில் குர்ஆனுடைய ஒரு ஆயத் என்னுடைய கவனத்தில் வந்தது.
சைத்தான் உங்களுக்கு எதிரியாவான் அவனை நீங்கள் எதிரியாகவே ஆக்கிக் கொள்ளுங்கள். (அல்குர்ஆன் அத்தியாயம் : 35 வசனம் : 6)
இந்த வசனத்தின் அடிப்படையில் சைத்தானை மட்டுமே என்னுடைய எதிரியாக ஆக்கிக் கொண்டேன் அவனிலிருந்து நான் தப்பித்துக் கொண்டால் போதும் என்ற முயற்சியில் முழுமையாக ஈடுபட்டேன். இது ஆறாவது விஷயம்.
உணவுப் பொருட்களுக்காக தன்னை இழிவு படுத்திக் கொண்டு ஹராம் ஹலால் பாராமல் சம்பாதிப்பில் ஈடுபட்டு விடுவதை மக்களிடத்தில் பார்த்தபோது குர்ஆனுடைய இந்த வசனம் என்னுடைய கவனத்தில் வந்தது
பூமியில் உள்ள உயிரினம் எதுவாக இருந்தாலும் அவற்றுக்கு உணவளிப்பது அல்லாஹ்வின் பொறுப்பாகும். (அல்குர்ஆன் அத்தியாயம் :11 வசனம் : 6)
இதற்குப் பின்பு அல்லாஹ்வுடைய பொறுப்பில் எந்த விஷயம் இருக்கிறதோ அதற்கான ஏன் கடினமாக உழைக்க வேண்டும் என்று சக்திக்கு உட்பட்டு முயற்சிகள் செய்து அல்லாஹ்வின் பொறுப்பில் விட்டு விட்டேன். இது ஏழாவது விஷயம்.
மக்களை பார்த்தேன் அவரவர்களும் ஏதேனும் ஒரு வஸ்துவின் மீது நம்பிக்கை வைத்து செயல்பட்டுக் கொண்டிருக்கிறார்கள்
சிலர் தங்களுடைய நிலங்களை நம்பி இருக்கிறார்கள்
சிலர் தங்களின் வணிகங்களை நம்பி இருக்கிறார்கள்
சிலர் தங்களுடைய தொழிலின் மீது நம்பிக்கை வைத்திருக்கிறார்கள்
சிலர் தங்களுடைய உடல் சக்தியின் மீதும்
சிலர் தங்களுடைய சிந்தனையின் மீதும் கல்வி ஆற்றலின் மீதும் நம்பிக்கை வைத்து செயல்பட்டுக் கொண்டிருக்கிறார்கள்
நான் அல்லாஹ்வின் பக்கம் திரும்பி குர்ஆனை பார்த்த போது அல்லாஹ் கூறுகிறான் :- யார் அல்லாஹ்வின் மீது நம்பிக்கை வைத்து பொறுப்பை சாட்டி விட்டார்களோ அல்லாஹுவே அவருக்கு போதுமானவனாக இருக்கிறான் என்கிற இந்த ஆயத் என்னுடைய கண்ணில் பட்டது. (அல்குர்ஆன் அத்தியாயம் தலாக் , வசனம் : 3)
இந்த ஆயத்தின் அடிப்படையில் நான் அல்லாஹ்வின் மீது தவக்குல் வைத்து அல்லாஹ்வே போதுமானவன் என்ற மனநிலைக்கு வந்துவிட்டேன். இது எட்டாவது விஷயம்.
இந்த எட்டு விஷயங்களையும் ஷைக்கு பல்கி ரஹ்மத்துல்லாஹி அலைஹி அவர்கள் தன்னுடைய சீடரிடம் செவியுற்ற போது என்னுடைய அருமை சீடரே என்னுடைய அருமை மாணவரே அல்லாஹ் உங்களுக்கு அதன் படி செயல்பட நல்ல வாய்ப்பை தருவானாக. ஆமீன்
நான் குர்ஆனுடைய வசனங்களை எல்லாம் ஆராய்ந்த போது அதனுடைய சாராம்சங்கள் நீங்கள் சொன்ன அத்தனையின் அடிப்படையின் வேராக இருப்பதை பெற்றுக் கொண்டேன் என்று சொல்லி பாராட்டினார்கள்.
நாமும் செயல்பட்டு உன்னதநிலையை அடைய முயற்சி செய்வோமாக
ஆமீன்.
கருத்துகள் இல்லை:
கருத்துரையிடுக